Trass i lite snø i fjellet, blir fylkesveg 520 over Saudafjellet til E134 ved Håra stengd for vinteren 19. desember klokka 19.00. Vegen vil vere open til Tverrdalen frå retninga mot Sauda inntil vidare, melder Vegvesenet. Det er uvanleg lite snø i fjellet no samanlikna med tidlegare år. Snøgrensa ligg på omtrent 800 meter over havet, og det er berre dei øvste partia som no har snø. – Det er mange kostnader ut over sjølve brøytinga knytt til å halda fjellet ope. Fjellet må overvakast, og me må ha beredskap til å handtera det som måtte komma av vêrsituasjonar framover, seier Ove Hausvik som er fagkoordinator i drift og vedlikehald nord i Rogaland fylkeskommune.