30 de xineru de 1899. Naz el médicu virólogu Max Theiler. Nel 1951 recibió’l Premiu Nobel en Fisioloxía o Medicina pol so trabayu precursor nel desenvolvimientu d’una vacuna contra la fiebre mariella.

#CalendariuCientificu

29 de xineru de 2018. Apruébase l’Estatutu de l'Axencia Espacial Africana (AfSA). Con sede n'El Cairu (Exiptu), busca promover y coordinar el desenvolvimientu d’actividaes espaciales n’África.

#CalendariuCientificu

28 de xineru de 1915. Naz la paleontóloga Andreína Celeste Marina Bocchino. Conózsela pol so trabayu en paleontoloxía de vertebraos.

#CalendariuCientificu

27 de xineru de 2021. Muerre la teunóloga de los alimentos Nunuk Nuraini. Nel 1982 creó’l saborizante secu de mi goreng pa la marca Indomie. Ye ún de los saborizantes pa fideos instantáneos más famosos del mundu.

#CalendariuCientificu

26 de xineru de 1839. Naz la química Rachel Lloyd. El so trabayu pa determinar la concentración de sacarosa de la remolacha azucarera ayudó al desenvolvimientu de la industria azucrera comercial en Norteamérica.

#CalendariuCientificu

25 de xineru de 1957. Muerre'l bacteriólogu Kiyoshi Shiga. Descubrió la bacteria Shigella, l’axente que causa la shigelosis, un tipu de disentería que se tresmite per vía fecal-oral.

#CalendariuCientificu

24 de xineru de 2020. Muerre la física Li Fanghua. Dedicóse principalmente a la física de difraición, la microscopía electrónica d’alta resolución y la investigación cristalográfica.

#CalendariuCientificu

23 de xineru de 1916. Naz la física Elizabeth Riddle Graves. Foi precursora na física de neutrones y na deteición y midimientu de neutrones rápidos.

#CalendariuCientificu

22 de xineru de 1476. L’humanista, lexicógrafu y gramáticu Antonio de Nebrija toma posesión de la cátedra de Prima de Gramática na Universidá de Salamanca.

#CalendariuCientificu

21 de xineru de 1894. Naz la xeóloga Edelmira Inés Mórtola. Investigó nel campu de la mineraloxía y tuvo una amplia carrera como docente. Ente les sos publicaciones destaca’l llibru Nociones de Mineralogía.

#CalendariuCientificu

20 de xineru de 2013. Investigadores de la Universidá de Cambridge publiquen l’artículu que confirma la existencia d’ADN con una héliz cuádruple en célules humanes.

#CalendariuCientificu

19 de xineru de 2023. El químicu teóricu y Premiu Nobel Roald Hoffmann visita’l MUDIC. Destaca tamién la so faceta como poeta, esplorando les fronteres ente la ciencia y la guapura de les lletres y les molécules.

#CalendariuCientificu

18 de xineru de 2024. Lesley Lokko ye la primer arquiteuta afrodescendiente n’algamar la Medaya d’Oru del Institutu Real d’Arquiteutos Británicos. Reconózse-y la so contribución a la xusticia y la democratización de l'arquiteutura.

#CalendariuCientificu

17 de xineru de 2005. Muerre'l científicu Albert Schatz. Foi codescubridor de la estreptomicina, un antibióticu aislláu a partir de la bacteria Streptomyces griseus.

#CalendariuCientificu